Kappróður í Føroyum

Kappróður hevur verið eitt kent fyribrigdi í Føroyum í øldir. Sum frítíðarítrótt gjørdi hann seg rættiliga galdandi í samband við framkomuna av tí nýmótans samfelagnum í fyrru helvt av hesi øld. Kappróður verður vanliga nevndur tjóðarítrótt Føroya. Tað sum eyðkennir ta føroysku róðrar-ítróttina er tað sermerkta sniðið, bátarnir hava. Bæði menn og kvinnur luttaka í kappróðrinum hvør fyri seg. Barnaróðrar hava eisini verið vælumtóktir seinastu árini, og í 2010 gjørdist barna kappróðurin eisini FM róður eins og hjá teimum ungu og teimum vaksnu. Hendan ítróttargrein, sum er summar-ítrótt burturav, er serstakliga væl umtókt, og áskoðaratalið er altíð sera stórt. FM-kappingarnar verða hildnar á teimum mongu summarstevnunum kring landið. Fyrsti róðurin er á Norðoyastevnu í Klaksvík, sum oftast er fyrsta vikuskifti í juni, kappróðurin er leygardag á Norðoyastevnu. Seinasti róðurin er á Ólavsøku 28. juli. Vanligasti teinurin ið róð verður er 1000 metrar. 10-mannaførini rógva tó 2000 metrar har tað ber til. Á Ólavsøku ber ikki til at rógva longri teinar enn 1000 metrar. Børnini rógva styttri teinar. Onkuntíð verður róð í fleiri bólkum, tá verður eisini finaluróður. Hetta er onkuntíð galdandi fyri 5-mannaførini sum eru flest í tali.^[1]

Kappast verður í bólkum eftir kyni og stødd av báti

Kappróður 5-mannafør dreingir á Jóansøku í Vági 2010.

Kappast verður í hesum bólkum til FM:^[2]

Barnaróður, dreingir í 5-mannførum
Barnaróður, gentur í 5-mannførum
Gentur í 5-mannaførum
Dreingir í 5-mannaførum
Kvinnur í 5-mannaførum
Kvinnur í 6-mannaførum
Menn í 6-mannaførum
Menn í 8-mannaførum
Menn í 10-mannaførum

Róðursmaðurin kann vera av hinum kyninum.

Stevnur í Føroyum við FM kappróðri

Barnaróður, gentur, á Norðoyastevnu 2012. Bátarnir á myndini eru: Blikur frá Argja Róðrarfelag, Hulda frá Froðbiar Sóknar Róðrarfelag, Jallurin frá Róðrarfelagnum Knørri og Royndin Fríða frá Vágs Kappróðrarfelag.

Niðanfyri sæst yvirlit yvir tær føroysku bý- og bygdastevnur, sum hava FM kappróður, og nær ið hesar stevnur eru.

Norðoyastevna er oftast fyrsta vikuskifti í juni í Klaksvík, FM kappróður er hvørt ár á Norðoyastevnu, tað er fyrsti róðurin
Eystanstevna er annað vikuskifti í juni í Runavík, FM róður er annað hvørt ár á Vestanstevnu, líka ár (2004, 06, 08, 2010 osfr.). Eystanstevna og Varmakeldustevnan skiftast um at hava FM kappróður.
Sundalagsstevna er eitt vikuskifti um miðan juni. Tríggjar bygdir skiftast um at vera vertir, tær eru: Kollafjørður, Hósvík og Hvalvík.^[3] Í 2007 og 2010 var stevnan í Hvalvík, í 2008 og 2011 í Hósvík, í 2006, 2009 og 2012 í Kollafirði.
Jóansøka er seinasta vikuskifti í juni ella tann leygardagin sum liggur tættast við jóansøkudag sum er 24. juni. Jóansøkan er annað hvør ár í Vági (líka ár, t.d. 2006, 08 og 2010) og annað hvørt ár á Tvøroyri (ólíka ár, t.d. 2005, 07, 09 og 2011). FM kappróður er altíð á jóansøku.
Varmakelda er fyrsta vikuskifti í juli í Fuglafirði, FM róður er annað hvørt ár, 2005, 07, 09, 2011 os.fr.
Vestanstevna er annað vikuskifti í juli. Stevnan skiftir millum 3 tær størstu bygdir í Vágum, tað vil siga, at Vestanstevnan er triðja hvørt ár í Sandavági, Miðvági og Sørvági. Stevnan var 2005, 2008 og 2011 í Miðvági, í Sandavági í 2006 og 2009 og í Sørvági í 2007 og 2010. Fyrr var Vestanstevnan eisini hildin í Vestmanna, seinastu ferð var ár 2000.^[4]
Fjarðastevna er um hálvan juli. Annað hvørt ár (líka ár) í Vestmanna (2004, 06, 08 og 2010). Strendur og Skála skiftast um at hava FM róðurin fjórða hvørt ár. Í 2007 og 2011 var fjarðastevnan við FM kappróðri á Strondum, í 2005 og 2009 á Skála.
Ólavsøka, ólavsøkukappróðurin er ólavsøkuaftan 28. juli í Havn. Seinasti FM kappróðurin er altíð á Ólavsøku.

Mest vinnandi róðrarfeløg í Føroyum

Havnarbáturin er tann báturin, sum hevur vunnið flest FM heitið, 13 ferðir. Havnar Róðrarfelag er mest vinnandi felag, tá man telur FM heitið saman, í alt 60 FM heitið frá 1973 til 2011.

Niðanfyri sæst yvirlit yvir kappróðrarfeløg í Føroyum, sum hava vunnið FM heitið. Hagtølini eru frá 1973-2011.^[5] Yvirlitið er dagført í juli 2012, áðrenn ólavsøkuróðurin. Skrásetingin av hagtølunum við føstum starti byrjaði í 1973, kappróðurin er tó nógv eldri enn tað.

Havnar Róðrarfelag 60
Argja Róðrarfelag 21
Kappróðrarfelagið NSÍ 20
Róðrarfelagið Knørrur 17
Klaksvíkar Róðrarfelag 14
Hvalvíkar Streymnesar Róðrarfelag 13
Kvívíkar Sóknar Róðrarfelag 10
Skála Róðrarfelag 9
Vestmanna Ítróttarfelag, róðrardeild 9
Sandavágs Ítróttafelag, róðrardeild 9
Miðvágs Róðrarfelag 8
Kollafjarðar Ítróttafelag, róðrardeild 7
Nólsoyar Ítróttafelag, róðrardeild 6
Froðbiar Sóknar Róðrarfelag 5
Oyndarfjarðar Ítróttafelag, róðrardeild 5
Vágs Kappróðrarfelag 5
Norðdepils-Hvannasunds Róðrarfelag 4
Strálan 4
Hósvíkar Róðrarfelag 3
Sunda Róðrarfelag 3
Gøtu Ítróttafelag, róðrardeild 1
ÍF-Kappróður 1
Ítróttafelagið Royn, róðrardeild 1

Kelda

Wikimedia Commons logo

Sí miðlasavnið

»Kappróður í Føroyum« í Wikimedia Commons.

stamps.fo^{[deyð leinkja]}

Slóðir úteftir

[1] RSF.fo, Reglugerð fyri bólkabýti^{[deyð leinkja]}

[2] Drekin.fo

[3] RSF.fo^{[deyð leinkja]}

[4] Drekin.fo - Bestu tíðirnar frá Vestanstevna (Vestmanna) (1973-)

[5] Drekin.fo, Mest vinnandi feløgini (1973-)

[1]

[2]

[3]

[4]

[5]