Gunnar Hoydal

Gunnar Hoydal (føddur 12. september 1941 í Keypmannahavn, deyður 15. apríl 2021) var føroyskur rithøvundur og arkitektur.

Lívsleið

Gunnar Hoydal varð føddur í Keypmannahavn í 1941, men vaks upp í Klaksvík og í Havn. Hann fór ungur til Danmarkar at ganga í skúla, og í 1967 var hann útbúgvin arkitektur. Í 1972 var hann settur í starv sum býararkitektur í Tórshavn, og røkti hann hetta starv í mong ár. Gunnar hevur skrivað og givið út yrkingar, stuttsøgur, skaldsøgur, leikir, ferðafrásagnir, listabøkur, ritroyndir og sangir, sum systirin Annika Hoydal syngur. Evnisvalið spennir víða – frá tí kensluborna til tað satiriska, frá tí persónliga til tað samfelagsliga. Gunnar hevur verið sera virkin á mentanarøkinum. M.a. hevur hann verið formaður í Rithøvundafelag Føroya, formaður í Listafólkasambandinum (LISA), limur í Mentunargrunni Løgtingsins, formaður í Fjølriti og Arkitektafelag Føroya. Umframt at skriva hevur hann eisini týtt útlendskar bókmentir til føroyskt. Í 2011 kom bókin Huckleberry Finn eftir Mark Twain út á føroyskum, Gunnar hevði týtt til føroyskt.

• 1972 Settur sum býararkitektur í Havn.
• 1981 - 1986 Formaður í Rithøvundafelagi Føroya.
• 1982 - 1988 Stovnari og fyrsti formaður í listafólkasambandinum LISA.
• 1984 - 1988 Limur í Mentunargrunni Løgtingsins.
• 1986 - 1994 Formaður í Ljósritagrunninum/Fjølriti.
• 1990 - 1995 Formaður í Arkitektafelagi Føroya.
• 1998 - Formaður í Rithøvundafelagnum.

Heiðurslønir og tilnevningar

• 1982 - Bókmentavirðisløn M.A. Jacobsens fyri fagrarbókmentir.
• 1989 - Í uppskoti til bókmentavirðisløn norðurlandaráðsins
• 1993 - Í uppskoti til bókmentavirðisløn norðurlandaráðsins
• 2002 - Mentanarvirðisløn Landsins
• 2010 - Skaldsøga hansara Í havsins hjarta var tilnevnd til Bókmentavirðisløn Norðurlandaráðsins

Útgávur

• 1972 - Myndasavn (bók um listamannin Ingolf Jacobsen á Kamarinum)
• 1976 - Den gode vilje (leikur til danska sjónvarpið, saman við Steinbjørn B. Jacobsen)
• 1982 - Av longum leiðum (stuttsøgur og ferðafrásagnir)
• 1983 - Mit eget land (sangir saman við Anniku Hoydal)
• 1988 - Hús úr ljóði (yrkingar)
• 1989 - Ingálvur av Reyni (listabók saman við øðrum)
• 1990 - Dulcinea (sangir saman við Anniku Hoydal)
• 1991 - Undir Suðurstjørnum (skaldsøga)
• 1995 - Janus Kamban (listabók)
• 1997 - Skeyk (sangleikur saman við øðrum)
• 1999 - Havið (sangir saman við Anniku Hoydal)
• 1999 - Dalurin Fagri (skaldsøga)
• 2001 - Land í sjónum (tíðartekstir)
• 2007 - Í havsins hjarta (skaldsøga)

Ávísingar úteftir

• Til minnis um Gunnar, Listaportal, 16. apríl 2021