Mikael Blak

Mikael Blak (føddur 1979) er ein føroyskur tónleikari, tónaskald og tónleikaframleiðari. Hann spælir á fleiri ymisk ljóðføri eitt nú bass og kontrabass. Hann er basspælari í punk-bólkinum 200. Harumframt hevur hann spælt bass við eitt nú Eivør Pálsdóttir. Hann var ein av tónleikarunum, sum spældu til Summartónar 2012. Mikael er sonur kenda tónleikaran og tónasmiðin Kristian Blak. Teir báðir eru, saman við øðrum, limir í klassiska tónleikabólkinum Yggdrasil, Kristian er leiðari og spælir klaver, og Mikael spælir bass. Mikael hevur framleitt fløguna Á fold eru túsund gudar hjá Hanus G. Johansen, fløgan kom út í november 2012.

Mikael Blak í 2013.

Komponerað tónleik til virðisløntir filmar

Mikael Blak hevur komponerað løg til stuttfilmarnir Summarnátt og Vetrarmorgun hjá Sakaris Stórá. Summarnátt vann tann allarfyrsta Geytan, ið er ein føroysk filmsheiðursløn. Tey fýra løgini sum mynda soundtrackið í Summarnátt hava hesi heiti: ”Byrjan”, "Dýrdarfall”, ”Summardáar” og ”Summarnátt”. Stuttfilmurin Vetrarmorgun vann eina virðisløn á einum av heimsins størtstu filmsfestivalum, á Berlinaluni 2014. Filmurin vann í bólkinum The Special Prize of the Generation 14plus International Jury.

Útgávur

Við 200

• 2001 - Tveyhundrad Prosent, TUTL. Mikael spælir bass, keybords, guitar, Synthesizer [Moog]. Mikael, Uni Árting og Niels Arge Galán hava skrivað sangirnir.
• 2005 Viva la Republica
• 2006 Graceland
• 2008 200 Decibel
• 2009 Stokkhólmssyndromið
• 2012 VENDETTA!

Spælir ymisk ljóðføri

• Eivør, 2000, TUTL (kontrabass)
• Teitur ‎– The Singer, 2008, Playground Music Scandinavia (bass)
• Clickhaze ‎– EP, Tutl, 2002. Mikael spælir her: Acoustic Bass, Organ [Hammond], Synthesizer [Moog].
• Kristian Blak & Yggdrasil (8) ‎– Risastova, Tutl, 2006. Mikael spælir bass.
• Tobias Fröberg ‎– Somewhere In The City, FireEgg Recordings , 2006. Bass.

Filmstónleikur

• 2013 - Gjørdi fleiri løg til stuttfilmin Vetrarmorgun, sum vann virðisløn á Berlinaluni 2014.
• 2012 - Gjørdi fýra løg til stuttfilmin Summarnátt, sum vann fyrstu føroysku filmsvirðislønina Geytan.