Tikari
Tikari, (latín Panthera tigris) er eitt stórt rándýr av kattarætt. Tikarum dámar best at vera fyri seg sjálvar. Tikarar eru ógvuliga dugnalig veiðidjór og brúka stríputa skinnið at fjala seg við í skóginum og leypa so á fongin. Teir duga væl at svimja, og teimum dámar væl at svala sær á í vøtnum, hyljum og áum. Tikarar eta mest stór og miðalstór djór, alt frá vatnbúfli til smáar hjørtir og villsvín. Tikarar eru hótt djóraslag og liva bara í Eystur- og Suðureystur-Ásia. Tikarar kunnu verða 3,4 metrar langir og viga upp í 305 kilo. Ein tikari kann svølta í tvær vikur, men kann tá eta upp í 30 kilo av kjøti í einari máltíð.
 | ||||||||||||||
|---|---|---|---|---|---|---|---|---|---|---|---|---|---|---|
 | ||||||||||||||
| Frøðilig flokking | ||||||||||||||
|
6 undirsløg finnast í dag:
- Bengalskur tikari (Panthera tigris tigris)
- Indokinesiskur tikari (Panthera tigris corbetti)
- Malaysiskur tikari (Panthera tigris jacksoni)
- Siberiskur tikari (Panthera tigris altaica)
- Suðurkinesiskur tikari (Panthera tigris amoyensis)
- Sumatratikari (Panthera tigris sumatrae)
Harumframt funnust 3 onnur undirsløg ið doyðu út seinastu 100 árini:
- Bali-tikari (Panthera tigris balica)
- Java-tikari (Panthera tigris sondaica)
- Kaspiskur tikari (Panthera tigris virgata)
Tikarin er eitt hótt djóraslag. Færri enn 10.000 tikarar liva nú í villini náttúru í Asia, serliga í India, Kina, Indonesia og Siberia. Tann villi tikarin er í vanda fyri at verða týndur, ikki minst tí veiðitjóvar drepa djórið fyri at selja tað ólógliga, serliga í Kina, sum er heimsins størsti keypari av friðaðum djórasløgum. Fyri nøkrum árum síðani setti kinverska stjórnin tiltøk í verk fyri at bjarga tikaranum undan týning, men nógv bendir á, at lógin um forboð ímóti handli við tikarum, ikki verður hildin.
