Guðrið Helmsdal

Guðrið Helmsdal Nielsen (26. februar 1941) er ein føroyskur rithøvundur, skald. Hon er móðir Rakel Helmsdal, rithøvunda. Guðrið búði í Føroyum tey fyrstu 12 árini, síðan flutti hon við foreldrum sínum til Danmarkar at búgva, og har búði hon til hon sum 26 ára gomul flutti heim aftur til Føroya. Hon byrjaði at yrkja sum 13 ára gomul. Fyrstu yrkingar hennara, sum komu út alment, vóru prentaðar í føroyska tíðarritinum í Danmark, Oyggjaskeggi, í 1958. Fyrsta yrkingasavn hennara Lýtt lot, sum kom út í 1963, var fyrsta modernistiska yrkingasavn á føroyskum og somuleiðis fyrsta yrkingasavn eftir eina kvinnu á føroyskum. Annað yrkingasavn hennara Morgun í mars kom út í 1971 og er yrkt bæði á føroyskum og donskum.

Útgivið

Yrkingasøvn

• 1963 - Lýtt lot (yrkingar. Myndir eftir Zacharias Heinesen)
• 1971 - Morgun í mars (yrkingar)

Ritgerðir o.a.

• 1979 - Føroyskur dansur og vertskapur í Leynum (ritgerð)

Útgivið á øðrum málum enn føroyskum

• Færøske digte 1900–1971. 1971. (Danskt)
• Færøysk lyrikk. 1974. (Nýnorskt)
• Bränning och bleke. 1976. (Svenskt)
• Regnbogastígur. 1981. (Íslendskt)
• Rocky Shores. An Anthology of Faroese Poetry. Sett saman og umsett hevur George Johnston. Wilfion Books, Paisley 1981. (Enskt)
• Modern Scandinavian Poetry - The Panorama of Poetry 1900–1975 in Eight Northern Countries. 1982. (Enskt)
• Stjørnuakrar – Sternenfelder. Umsett hevur Anette Nielsen, kápumynd eftir Zacharias Heinesen. Projekte Verlag 2006, ISBN 3-86634-076-1 (Týskt).
• Fýra yrkingar í Structo, sum er bretskt bókmentatíðarrit. Randi Ward hevur týtt yrkingarnar úr føroyskum og donskum til enskt, yrkingarnar eru hesar: “Fjarðakvirra”, “Morgunfjøll”, “Heystfjøll” og “Solnedgang”. (Enskt)

Heiðurslønir

• 1974 - Mentanarvirðisløn M. A. Jacobsens fyri Morgun í mars og Lýtt lot.