Funksjón

Funksjónir lýsa eintýdda sambandið millum óhefta og hefta variabulin. Sambandið verður ásett á ymiskan hátt, so sum við rokniforskrift, við rás, við talvu og við algoritmu. Funksjón er forskrift, sum til ein og hvønn lut $(x)$ í frummongdini knýtir júst eitt tal, $f(x)$, í virðismongdini. Skipað talpar eru tvey tøl, sum eru skipað í raðfylgju: Skipað talpør verða skrivað í klombrum og við komma millum tølini, til dømis $(-3,5)$. At talpør eru skipað, merkir, at eitt nú $(1,2)$ er ikki tað sama sum $(2,1)$. Fyrra talið í einum skipaðum talpari verður nevnt fyrri liður. Seinna talið í einum skipaðum talpari verður nevnt seinni liður. Eru eingir 1. liðir eins stórir í einari relatión, nevna vit hana funksjón. Eina mongd av skipaðum talpørum nevna vit eina relatión. Mongdina av 1. liðum í einari funksjón nevna vit frummongd, og mongdina av 2. liðum nevna vit virðismongd. Sambandið millum 1. liðirnar og 2. liðirnar í einari funksjón nevna vit forskrift. Hon verður ofta skrivað $f(x)$, men eisini við øðrum bókstøvum, til dømis $h(x)$ ella $g(x)$.

Linjurøtt funksjón, vanlig forskrift: $f(x)=ax+b$.

Ein linjurøtt funksjón er ein funksjón við forskriftini $f(x)=ax+b$, har $a$ og $b$ eru konstantar. $a$ verður nevnt halltalið, og $b=f(0)$ er skeringin við uppásina. Í krosskipanum verða linjurættar funksjónir teknaðar sum linjurættar myndir, vanliga kallaðar rættar linjur.

• 
  Hetta er funksjón, tí eingir 1. liðir eru eins. Talpørini $(2,C)$ og $(3,C)$ hava sama 2. lið, men tað hevur einki at siga.
• 
  Hetta er ikki funksjón. Talpørini $(2,B)$ og $(2,C)$ eru ymisk, men tey hava sama 1. lið.

Sí eisini

• Polynom á øðrum stigi