Niagaraá

Niagaraá (enskt: Niagara River) er ein 55-58 kilometrar long á í eystara parti av Norðuramerika. Hon rennur úr Erievatni út í Ontariovatn og knýtir hesi bæði vøtnini saman. Summi halda, at áin er kallað eftir fyrrverandi irokesisku bygdini Ongniaahra, sum verður víst á einum korti fyri fyrstu ferð í 1641.

Niagaraá

Landafrøði

Niagaraá rennur beint á markinum millum Kanada og USA, soleiðis at vestari áarbakkin liggur í kanadiska landslutinum Ontario og eystari áarbakkin kemur at liggja í amerikanska stakríkinum New York.

Býirnir Fort Erie og Buffalo liggja vestarumegin og eystarumegin, har áin byrjar, tá hon rennur úr Erievatni. Býurin Niagara-on-the-Lake liggur við áarmunnan í útsynningshorninum av Ontariovatni.

Í Niagaraá eru hinir viðgitnu Niagarafossar. Teir tríggjar fossarnir kallast Horseshoe Falls, Bridal Veil Falls og American Falls. Horseshoe Falls er kraftmiklasti fossurin í Norðuramerika mált eftir fallinum (57 metrar) og vatnmongd. Fossurin er góðar 790 metrar breiður. Nógv ferðafólk koma at hyggja at stórbæra fossinum.

Nógvar oyggjar eru í ánni. Størsta oyggin eitur "Grand Island". Hon liggur fullkomiliga á økinum hjá USA.

Wellandveitin

Stór farmaskip sigla í dag ígjøgnum veitina Welland Canal, sum varð grivin fram við fossunum á kanadisku síðuni tíðliga í 19. øld. Veitin byrjar í Port Colborne í landnyrðingsendanum av Erievatni, vestanfyri Buffalo. Har er eisini byrjan av slúsaskipanini Saint Lawrence Seaway. Veitin endar í St. Catherines á útsynningsbakka av Ontariovatni.

Myndir

• 
  Brúgvin Peace Bridge millum Fort Erie í Kanada og Buffalo í USA .
• 
  Fossurin Horseshoe Falls liggur fullkomiliga á kanadisku síðuni.
• 
  Fossurin Bridal Veil Falls liggur fullkomiliga á amerikanasku síðuni.
• 
  Fossurin American Falls og oyggin Goat Island liggja fullkomiliga á amerikanasku síðuni.
• 
  Whirlpool Rapids liggja báðumegin markið millum londini.
• 
  Amerikanska vatnorkuverkið Niagara Power Project
• 
  Kanadisku vatnorkuverkini Adam Beck Stations í Niagara Falls, Ontario.
• 
  Áarmunnurin av Niagaraánni.

Ávísingar úteftir

• Facts about Niagara Falls, niagaraparks.com (á enskum)
• Niagara River, thecanadianencyclopedia.com (á enskum)
• Myndir, nflibrary.ca (á enskum)
• Niagara Region, wikivoyage.org (á enskum)

Keldur

Hendan greinin um USA er ein stubbi. Tú kanst hjálpa Wikipedia við at víðka hana